I.E.S. DA

Apuntes

I.E.S. DA TERRA CHÁ, José Trapero Pardo Dpto.: Xeografía e Historia 1 UNIDADE I: OS SÉCULOS XVI E XVII A finais do século XV, a época feudal concluíu, comezando a Idade Moderna. E este cambio en España vai suceder co reinado dos Reis Católicos, Sabela e Fernando, con quen naceu unha nova monarquía, a autoritaria, dando paso ao xurdimento do Estado moderno. Un novo modelo de goberno que se consolidou no século XVI, cos Austrias, converténdose o Imperio español no maior do mundo, grazas, en parte, ás riquezas chegadas tras o descubrimento e a conquista de América. Porén, este, xa na centuria seguinte, entrou nun proceso de decadencia e descomposición. Unha dobre evolución á que non permaneceu allea Galiza, cun estrutura económica, eminentemente, agrícola e na que se fixo forte a fidalguía. 1.-A nova monarquía dos Reis Católicos Seguindo a estela do que acontecía en Europa, os reis españois, nas últimas décadas da Idade Media, impuxéronse sobre os señores feudais, consolidaron a súa autoridade e crearon monarquías fortes, gobernando de forma persoal. Unha nacente realidade que no caso dos territorios peninsulares se concretou baixo o mandato dos Reis Católicos, así coñecidos polo títu...